Usne Jo Dard Ka Ambar Lagaya Hua Hai

us ne jo dard ka ambar lagaya hua hai

hum ne bhi dil sar-e-bazar lagaya hua hai

ek aafat ki tarah hum ne ab is sine se

tha lagana jise sarkar lagaya hua hai

pyar ki taza hawa aae kahan se hum ne

KHud ko ek surat-e-diwar lagaya hua hai

kya kisi but ki mohabbat mein giraftar hue

kyun bhala sine se zunnar lagaya hua hai

ek lamhe ko bhi maujud nahin hai rahat

ghar mein kya halqa-e-aghyar lagaya hua hai

apne se dur bhi rakkha hai bahut tu ne hamein

ek tasma sa bhi ai yar lagaya hua hai

taki tafriq dilon mein na rahe hargiz 'tur'

hum ne is par ko us par lagaya hua hai