Kisi Ki Be-ruKHi Ka Gham Nahin Hai
kisi ki be-ruKHi ka gham nahin hai
ki itna rabt bhi ab kam nahin hai
na hoshyari na ghaflat aur na masti
hamara ab koi aalam nahin hai
rag-e-jaan se bhi wo nazdik-tar hain
magar ye fasla bhi kam nahin hai
yahan kya zikr sharm o aabru ka
ye daur-e-azmat-e-maryam nahin hai
fughan ek mashghala hai aashiqon ka
ye aadat bar-bina-e-gham nahin hai
farishton ki ye shan-e-be-gunahi
jawab-e-laghzish-e-adam nahin hai
Mahirul Qadri 
(382) Peoples Rate This