Karishma-saz-e-azal Kya Tilism Bandha Hai

karishma-saz-e-azal kya tilism bandha hai

parida rang hai har naqsh phir bhi pyara hai

tu ru-ba-ru ho to ai ru-e-yar tujh se kahen

wo harf-e-gham ki harif-e-gham-e-zamana hai

kabhi to hum pe uThe chashm-e-ashna ki tarah

wo ek nigah ki sad-gardish-e-zamana hai

hamari aankhon se nairangi-e-jahan dekho

hamari aankhon mein ek umr-e-sad-tamasha hai

hawa-e-shauq wo din kis KHizan ke sath gae

tamam umr hui intizar-e-farda hai