Jab Se Junun-e-shauq Ke Mehwar Badal Gae

jab se junun-e-shauq ke mehwar badal gae

chehron ke phul qad ke sanobar badal gae

kyun apne sath dida-e-hairan ko le gaya

bachpan gaya to husn ke paikar badal gae

zahrab-e-ishq pi na sake bul-hawas kabhi

kahne ki baat hai KHum-o-sagar badal gae

soya to aankh mein tere sapne sama gae

jaga to rang KHwab ke yaksar badal gae

ai umr-e-rafta luT ke aa ja bas ek bar

aa ja ki subh-o-sham ke tewar badal gae