Na Kuchh Ziyaada Na Kuchh Kam Tere Hawale Se

na kuchh ziyaada na kuchh kam tere hawale se

wahi hai dard ka aalam tere hawale se

khule jo zaKHm ke Tanke to ye hua mahsus

saba ne rakh diya marham tere hawale se

wahi hai dil ka taDapna wahi hai kaifiyyat

wahi mizaj hai paiham tere hawale se

chali hai hijr ke mausam mein jab bhi purwai

hui hai aankh meri nam tere hawale se

KHizan ka zikr to meri zaban pe tha hi nahin

bahaar karti hai matam tere hawale se

meri hayat thi KHushiyon se ham-kanar magar

hue hain dard munazzim tere hawale se

tera hawala diya tha ki yak-ba-yak 'majid'

zamana ho gaya barham tere hawale se