Maut Ka Git

arsh ki aaD mein insan bahut khel chuka

KHun-e-insan se haiwan bahut khel chuka

mor-e-be-jaan se sulaiman bahut khel chuka

waqt hai aao do-alam ko digar-gun kar den

qalb-e-giti main tabahi ke sharare bhar den

zulmat-e-kufr ko iman nahin kahte hain

sag-e-KHun-KHar ko insan nahin kahte hain

dushman-e-jaan ko nigahban nahin kahte hain

jag uThne ko hai ab KHun ka talatum dekho

malak-ul-maut ke chehre ka tabassum dekho

jaan lo qahr ka sailab kise kahte hain

na-gahan maut ka girdab kise kahte hain

qabr ke pahluon ki dab kise kahte hain

daur-e-na-shad ko ab shad kiya jaega

ruh-e-insan ko aazad kiya jaega

nala-e-be-asar allah ke bandon ke liye

sila-e-dar-o-rasan haq ke rasulon ke liye

qasr-e-shaddad ke dar band hain bhukon ke liye

phunk do qasr ko gar kun ka tamasha hai yahi

zindagi chhin lo duniya se jo duniya hai yahi

zalzalon aao dahakte hue lao aao

bijlio aao garaj-dar ghatao aao

aandhiyo aao jahannam ki hawao aao

aao ye kurra-e-napak bhasam kar Dalen

kasa-e-dahr ko mamur-e-karam kar Dalen