Na Rasta Na Koi Dagar Hai Yahan
na rasta na koi Dagar hai yahan
magar sab ki qismat safar hai yahan
sunai na degi dilon ki sada
dimaghon mein wo shor-o-shar hai yahan
hawaon ki ungli pakaD kar chalo
wasila yahi mo'tabar hai yahan
na is shahr-e-be-his ko sahra kaho
suno ek hamara bhi ghar hai yahan
palak bhi jhapakte ho 'maKHmur' kyun
tamasha bahut muKHtasar hai yahan
Makhmoor Saeedi 
(476) Peoples Rate This