Rawan-dawan Nai Tahzib Ka Safar Rakkho

rawan-dawan nai tahzib ka safar rakkho

magar nigah ko manzil se ba-KHabar rakkho

sadaqaton ki hifazat ka hausla ho agar

to apne hathon se neze pe apna sar rakkho

tumhaari nasl ki parwaz mein KHalal na paDe

mat un ke samne apne shikasta par rakkho

na gham karo jo kaDi dhup ka safar hai hayat

jilau mein apne koi saya-e-shajar rakkho

sahar ke bhule sar-e-sham lauT aaenge

lawen baDha ke charaghon ki baam par rakkho

jo sach likhogi to phir kuchh na likh sakogi 'nasim'

qalam mein mani badalne ka bhi hunar rakkho