Darmiyan Aa Rahi Hai Nafrat Kyun
darmiyan aa rahi hai nafrat kyun
jab gale mil gae shikayat kyun
aadmi tum bhi aadmi hum bhi
phir hui KHatm aadamiyat kyun
ho gaya ishq aap ko shayad
umr is mein nai musibat kyun
kaun rakh paya mal-o-daulat ko
jaane wale se ye mohabbat kyun
thak gaya hai mera sitamgar kya
sans le lene ki ijazat kyun
sab ki maen bhi beTiyan hi thin
aaj beTi bani musibat kyun
aap ka sher bolta hai 'asar'
KHud-satai ki phir zarurat kyun
Marghoob Asar Fatmi 
(380) Peoples Rate This