Charagh-ha-e-takalluf Bujha Diye Gae Hain
charagh-ha-e-takalluf bujha diye gae hain
uThao jam ki parde uTha diye gae hain
ab is ko did kahen ya ise kahen didar
hamare aage se jo hum haTa diye gae hain
ab is maqam pe hai ye junun ki hosh nahin
miTa diye gae hain ya bana diye gae hain
ye raaz marne se pahle to khul nahin sakta
sula diye gae hain ya jaga diye gae hain
jo mil gae to tawangar na mil sake to gada
hum apni zat ke andar chhupa diye gae hain
charagh-e-bazm hain hum raaz-dar-e-sohbat-e-bazm
bujha diye gae hain ya jala diye gae hain
Meer Ahmad Naved 
(352) Peoples Rate This