Soz-e-dil Ka Zikr Apne Munh Pe Jab Late Hain Hum
soz-e-dil ka zikr apne munh pe jab late hain hum
shama san apni zaban se aap jal jate hain hum
dam-ba-dam us shoKH ke aazurda ho jaane se aah
jab nahin kuchh apna bas chalta to ghabraate hain hum
baiThne ko to nahin aae hain yan ai baghban
kyun KHafa hota hai itna hum se tu jate hain hum
dil se hum chhuT jaen ya dil hum se chhuT jawe kahin
is ke aljheDe se ab to saKHt uktate hain hum
dil KHuda jaane kidhar gum ho gaya ai dostan
DhunDhte phirte hain kab se aur nahin pate hain hum
donon diwane hain kya samjhenge aapas mein abas
hum ko samjhata hai dil aur dil ko samjhate hain hum
yaad mein us gul-badan ki aaj-kal tu ai 'hasan'
bagh mein phir phir ke apne dil ko bahlate hain hum
(367) Peoples Rate This