Maine Jo Be-kasana Majlis Mein Jaan Khoi

main ne jo be-kasana majlis mein jaan khoi

sar par mere khaDi ho shab shama zor rawi

aati hai shama shab ko aage tere ye kah kar

munh ki gai jo loi to kya karega koi

be-taqati se aage kuchh puchhta bhi tha so

rone ne har ghaDi ke wo baat hi Duboi

bulbul ki bekali ne shab be-dimagh rakha

sone diya na hum ko zalim na aap soi

us zulm pesha ki ye rasm-e-qadim hai gi

ghairon pe mehrbani yaron se kina-jui

naubat jo hum se gahe aati hai guftugu ki

munh mein zaban nahin hai is bad-zaban ke goi

us mah ke jalwe se kuchh ta 'mir' yaad dewe

ab ke gharon mein hum ne sab chandni hai boi