Dil Mera Soz-e-nihan Se Be-muhaba Jal Gaya

dil mera soz-e-nihan se be-muhaba jal gaya

aatish-e-KHamosh ki manind goya jal gaya

dil mein zauq-e-wasl o yaad-e-yar tak baqi nahin

aag is ghar mein lagi aisi ki jo tha jal gaya

main adam se bhi pare hun warna ghafil bar-ha

meri aah-e-atishin se baal-e-unqa jal gaya

arz kije jauhar-e-andesha ki garmi kahan

kuchh KHayal aaya tha wahshat ka ki sahra jal gaya

dil nahin tujh ko dikhata warna daghon ki bahaar

is charaghan ka karun kya kar-farma jal gaya

main hun aur afsurdagi ki aarzu 'ghaalib' ki dil

dekh kar tarz-e-tapak-e-ahl-e-duniya jal gaya

KHanman-e-ashiqan dukan-e-atish-baz hai

shola-ru jab ho gae garm-e-tamasha jal gaya

ta kuja afsos-e-garmi-ha-e-sohbat ai KHayal

dil ba-soz-e-atish-e-dagh-e-tamanna jal gaya

hai 'asad' begana-e-afsurdagi ai bekasi

dil z-andaz-e-tapak-e-ahl-e-duniya jal gaya

dud mera sumbulistan se kare hai ham-sari

bas-ki shauq-e-atish-e-gul se sarapa jal gaya

shama-ruyan ki sar-angusht-e-hinai dekh kar

ghuncha-e-gul par-fishan parwana-asa jal gaya