Ishq Mujhko Nahin Wahshat Hi Sahi
ishq mujh ko nahin wahshat hi sahi
meri wahshat teri shohrat hi sahi
qata kije na talluq hum se
kuchh nahin hai to adawat hi sahi
mere hone mein hai kya ruswai
ai wo majlis nahin KHalwat hi sahi
hum bhi dushman to nahin hain apne
ghair ko tujh se mohabbat hi sahi
apni hasti hi se ho jo kuchh ho
aagahi gar nahin ghaflat hi sahi
umr har-chand ki hai barq-e-KHiram
dil ke KHun karne ki fursat hi sahi
hum koi tark-e-wafa karte hain
na sahi ishq musibat hi sahi
kuchh to de ai falak-e-na-insaf
aah o fariyaad ki ruKHsat hi sahi
hum bhi taslim ki KHu Dalenge
be-niyazi teri aadat hi sahi
yar se chheD chali jae 'asad'
gar nahin wasl to hasrat hi sahi
Mirza Ghalib 
(2255) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544