Qafas Mein Hun Gar Achchha Bhi Na Jaanen Mere Shewan Ko

qafas mein hun gar achchha bhi na jaanen mere shewan ko

mera hona bura kya hai nawa-sanjaan-e-gulshan ko

nahin gar hamdami aasan na ho ye rashk kya kam hai

na di hoti KHudaya aarzuwe-e-dost dushman ko

na nikla aankh se teri ek aansu us jarahat par

kiya sine mein jis ne KHun-chakan mizhgan-e-sozan ko

KHuda sharmae hathon ko ki rakhte hain kashakash mein

kabhi mere gareban ko kabhi jaanan ke daman ko

abhi hum qatl-gah ka dekhna aasan samajhte hain

nahin dekha shanawar ju-e-KHun mein tere tausan ko

hua charcha jo mere panw ki zanjir banne ka

kiya betab kan mein jumbish-e-jauhar ne aahan ko

KHushi kya khet par mere agar sau bar abr aawe

samajhta hun ki DhunDe hai abhi se barq KHirman ko

wafa-dari ba-shart-e-ustuwari asl iman hai

mare but-KHane mein to kabe mein gaDo barahman ko

shahadat thi meri qismat mein jo di thi ye KHu mujh ko

jahan talwar ko dekha jhuka deta tha gardan ko

na luTta din ko to kab raat ko yun be-KHabar sota

raha khaTka na chori ka dua deta hun rahzan ko

suKHan kya kah nahin sakte ki juya hun jawahir ke

jigar kya hum nahin rakhte ki khoden ja ke madan ko

mere shah-e-sulaiman-jah se nisbat nahin 'ghaalib'

faridun o jam o keKHusrau o darab o bahman ko

(1064) Peoples Rate This

Your Thoughts and Comments

Qafas Mein Hun Gar Achchha Bhi Na Jaanen Mere Shewan Ko In English By Famous Poet Mirza Ghalib. Qafas Mein Hun Gar Achchha Bhi Na Jaanen Mere Shewan Ko is written by Mirza Ghalib. Read famous Poem Qafas Mein Hun Gar Achchha Bhi Na Jaanen Mere Shewan Ko for youth and Student by Mirza Ghalib. Free Download Qafas Mein Hun Gar Achchha Bhi Na Jaanen Mere Shewan Ko in PDF.