Ye Hum Jo Hijr Mein Diwar-o-dar Ko Dekhte Hain
ye hum jo hijr mein diwar-o-dar ko dekhte hain
kabhi saba ko kabhi nama-bar ko dekhte hain
wo aae ghar mein hamare KHuda ki qudrat hai
kabhi hum un ko kabhi apne ghar ko dekhte hain
nazar lage na kahin is ke dast-o-bazu ko
ye log kyun mere zaKHm-e-jigar ko dekhte hain
tere jawahir-e-tarf-e-kulah ko kya dekhen
hum auj-e-tala-e-lal-o-gohar ko dekhte hain
Mirza Ghalib 
(1753) Peoples Rate This