Waiz Milegi KHuld Mein Kab Is Qadar Sharab

waiz milegi KHuld mein kab is qadar sharab

pani ke badle pite hain ai be-KHabar sharab

aamad mein us ki mast hue kuchh KHabar nahin

saqi hai kaun jam kahan aur kidhar sharab

us qulzum-e-gunah mein Duba hua hun main

jis mein hai ek mauja-e-daman-e-tar sharab

masti mein un ko lag gai lau aur ghair ki

deni shab-e-visal na thi is qadar sharab

iqrar-e-wasl aur wo mast-e-ghurur-e-naz

aaya hai pi ke tu kahin ai nama-bar sharab

'salik' mile jo bazm mein us ki to lutf hai

warna piya hi karte hain hum apne ghar sharab