Qatil Hai Jo Mera Wahi Apna Sa Lage Hai

qatil hai jo mera wahi apna sa lage hai

duniya se juda ho ke wo duniya sa lage hai

har sham mere dil mein hai yaadon se charaghan

har sham meri palkon pe mela sa lage hai

kis haal pe chhoDe hai mujhe gardish-e-ayyam

sabza bhi jahan dekhe hun sahra sa lage hai

baatil ke jalae hue dipak ka hai charcha

jo sach ka hai suraj wo tamasha sa lage hai

sawan ki bahaaron sa wahi husn ka paikar

kahne ko hai begana par apna sa lage hai