Abhi Kuchh Aur Bhi Gard-o-ghubar Ubhrega

abhi kuchh aur bhi gard-o-ghubar ubhrega

phir is ke baad mera shah-sawar ubhrega

safina Duba nahin hai nazar se ojhal hai

mujhe yaqin hai phir ek bar ubhrega

paDi bhi rahne do mazi pe maslahat ki rakh

kuredne se faqat intishaar ubhrega

hamare ahd mein shart-e-shanawari hai yahi

hai Dubne pe jise iKHtiyar ubhrega

shab-e-siyah ka muqaddar shikast hai 'mohsin'

dar-e-ufuq se phir anjum-shikar ubhrega