Chalo ChhoDo

chalo chhoDo

mohabbat jhuT hai

ahd-e-wafa ek shaghl hai be-kar logon ka

talab sukhe hue patton ka be-raunaq jazira hai

KHalish dimak-zada auraq par bosida satron ka zaKHira hai

KHummar-e-wasl tapti dhup ke sine pe uDte baadalon ki raegan baKHshish!

ghubar-e-hijr-e-sahra mein sarabon se aTe mausam ka KHamyaza

chalo chhoDo

ki ab tak main andheron ki dhamak mein sans ki zarbon pe

chahat ki bina rakh kar safar karta raha hunga

mujhe ehsas hi kab tha

ki tum bhi mausamon ke sath apne pairahan ke rang badlogi

chalo chhoDo

wo sare KHwab kachchi bharbhari miTTi ke be-qimat gharaunde the

wo sare zaiqe meri zaban par zaKHm ban kar jam gae honge

tumhaari ungliyon ki naram poren pattharon par nam likhti thin mera lekin

tumhaari ungliyan to aadatan ye jurm karti thin

chalo chhoDo

safar mein ajnabi logon se aise hadse sarzad hua karte hain sadiyon se

chalo chhoDo

mera hona na hona ek barabar hai

tum apne KHal-o-KHad ko aaine mein phir nikharne do

tum apni aankh ki basti mein phir se ek naya mausam utarne do

mere KHwabon ko marne do

nai taswir dekho

phir naya maktub likho

phir nae mausam nae lafzon se apna silsila joDo

mere mazi ki chahat raegan samjho

meri yaadon se kachche rabte toDo

chalo chhoDo

mohabbat jhuT hai

ahd-e-wafa ek shaghl hai be-kar logon ka