Bad-zan Hain Ahl-e-kaba Mujh Dair-ashna Se
bad-zan hain ahl-e-kaba mujh dair-ashna se
kahte hain mujh ko kafir fariyaad hai KHuda se
bedad mohtasib ki fariyaad hai KHuda se
barse sharab ghar ghar mai-KHwar ki dua se
chitwan badal rahi hai nam aa gaya wafa ka
tewar bigaD rahe hain afsana-e-wafa se
hum kyun tumhein bataen hum kyun tumhein jataen
roz-e-jaza na jaane mangenge kya KHuda se
wo puchhte hain mujh se kaise ho tum 'mubarak'
main kah raha hun achchha sarkar ki dua se
Mubarak Azimabadi 
(663) Peoples Rate This