Nawak Kahen Sinan Kahen Talwar Kya Kahen
nawak kahen sinan kahen talwar kya kahen
tu hi bata tujhe nigah-e-yar kya kahen
shikwa na dam ka hai na sayyaad ka gila
hum aap ho gae hain giraftar kya kahen
izhaar-e-haal-e-zar ka aison se faeda
aazar dil ka tujh se dil-azar kya kahen
karte hain waiz aap mazammat sharab ki
kahte hain kya janab ko mai-KHwar kya kahen
aison se tark-e-mai ka 'mubarak' sawal kya
tauba ki tujh se rind-e-qadah-KHwar kya kahen
Mubarak Azimabadi 
(491) Peoples Rate This