Aaftab Aafat Hai Aab Ke Liye

aaftab aafat hai aab ke liye lekin

mere dil ke chashmon mein aaftab khilte hain

mere dil ke chashme jo aasman ke peDon mein

saya saya bahte hain

dhup in ke pani mein KHwab ki tarah uryan

parbaton ki jholi mein baiTh kar nahati hai

apne phul se panw paniyon mein dhoti hai

arsh ki nigahon mein ye magar KHarabi hai

aasman walon ne dil ke husn-e-uryan ko

wo libas baKHsha hai jis ke saKHt pardon mein

dhup bhi hijabi hai!!