Kya Koi Dard Dil Ke Muqabil Nahin Raha

kya koi dard dil ke muqabil nahin raha

ya ek dil bhi dard ke qabil nahin raha

un ke lahu ki dahr mein arzaniyan na puchh

jin ka gawah daman-e-qatil nahin raha

apni talash hai hamein aankhon ke shahr mein

aaina jab se apne muqabil nahin raha

sargarmi-e-hayat hai be-maqsad-e-hayat

sab rah-naward-e-shauq hain mahmil nahin raha

us ka KHayal aata hai apne KHayal se

ab wo bhi apni yaad mein shamil nahin raha