Girna Nahin Hai Aur Sambhalna Nahin Hai Ab

girna nahin hai aur sambhalna nahin hai ab

baiThe hain rahguzar pe chalna nahin hai ab

pichhla pahar hai shab ka sawere ki KHair ho

bujhte hue charagh hain jalna nahin hai ab

hai aastin se kaam na daman se kuchh gharaz

patthar bane hue hain pighalna nahin hai ab

manzar Thahar gaya hai koi dil mein aan kar

duniya ke sath us ko badalna nahin hai ab

lab-ashna-e-harf-e-tabassum nahin rahe

dil ke lahu ko ashk mein Dhalna nahin hai ab