KHabar

bail ne gae ka munh chuma KHabar ban na saki

dekhne walon ko irfan-e-nazar ho na saka

ghoDe ne ghoDi ka munh chuma KHabar ban na saki

hinhinaya pe koi ahl-e-KHabar ho na saka

ye KHabar hai ki sar-e-rah kisi laDki ko

chumta pakDa gaya ek sharabi laDka

wahin qanun ki zanjir-e-giran tauq bani

wahin aKHbar ki surKHi ne unhen ja pakDa

main yahi soch raha tha ki sar-e-sham mujhe

jate suraj ke bhi atwar kuchh aise hi mile

us ka munh zard tha ehsas-e-judai hoga

us ne ek badli ka munh chum liya chupke se

dafatan badli ka munh surKH hua aur haya

dauDi KHun ban ke rag-o-pai mein ki gulnar hui

us ke daman pe chhalak uTThe sitare aansu

aur suraj ki tarah KHud bhi wahin Dub gai

wahi tare the magar raat ke aKHbar-farosh

ye KHabar sham se hi sare falak par pahunchi

pahle to lakhon darichon se nigahban jhanke

chandni chhiTki to phir chand ne ki rakhwali

subh-dam nind ke mate the sabhi ahl-e-falak

suraj aaya to kisi ko na raha is ka KHayal

wahi badli thi ufuq par wahi unwan-e-haya

donon takte rahe mabhut nigahon se jamal

phir mohabbat ne kiya sabt salam-e-rangin

surKH badli ka lahu dauD gaya chaar taraf

donon KHush the unhen malum tha aazad hain wo

un ka milna nahin insan ki nigahon ka hadaf

main ne dekhi hai magar donon ki ye gustaKHi

main KHabar deta hun aKHbar ko dekho to sahi

(554) Peoples Rate This

Your Thoughts and Comments

KHabar In English By Famous Poet Yusuf Zafar. KHabar is written by Yusuf Zafar. Read famous Poem KHabar for youth and Student by Yusuf Zafar. Free Download KHabar in PDF.