Lahr Lahr Kya Jagmag Jagmag Hoti Hai

lahr lahr kya jagmag jagmag hoti hai

jhil bhi koi rang badalta moti hai

kawa kaT ke upar uThti hain qazen

gun gun gun gun paron ki gunjan hoti hai

chaDhta hua parwaz ka nashsha hai aur main

tez hawa rah rah kar Dank chubhoti hai

gahre sannaTe mein shor hawaon ka

tariki suraj ki lash pe roti hai

dekho is be-his nagin ko chhuna mat

kya malum ye jagti hai ya soti hai

meri KHasta-mizaji dekhte sab hain magar

kitne ghamon ka bojh uThae hoti hai

kis ka jism chamakta hai pani mein 'zeb'

kis ka KHazana raat nadi mein Duboti hai