Naqsh-e-taswir Na Wo Sang Ka Paikar Koi

naqsh-e-taswir na wo sang ka paikar koi

us ko jab dekho badal jata hai manzar koi

kashish-e-harf-e-tabassum hai labon mein ru-posh

gosha-e-chashm se hansta hai sitamgar koi

jurra-e-aKHir-e-mai hai ki giran-KHwabi-e-shab

chand sa Dub raha hai mere andar koi

chaDhte dariya sa wo paikar wo ghaTa se gesu

rasta dekh raha hai mera manzar koi

sadaf-e-bahr se nikli hai abhi laila-e-shab

apni muTThi mein chhupae hue gauhar koi

kho gaya phir kahin aflak ki pahnai mein

der tak chamka kiya TuTa hua par koi

saf-e-ada hai mere samne aur pusht pe hain

na farishte na ababilon ka lashkar koi

TuT kar girti hai upar mere chaTTan ki hai

baiat-e-sang mere dast-e-hunar par koi

raat bhar taqat-e-parwaz ugati hai unhen

kaT deta hai sahar-dam mere shahpar koi

mere qatil ne baDha di mere sach ki tauqir

is sile ke liye mauzun tha payambar koi

aaj is qarya-e-viran mein ye aahaT kaisi

dil ke andar hai koi aur na bahar koi

kisi jhaDi se kiran chhuTi hai suraj ki ki 'zeb'

chamak uTTha hai kisi hath mein KHanjar koi

(587) Peoples Rate This

Your Thoughts and Comments

Naqsh-e-taswir Na Wo Sang Ka Paikar Koi In English By Famous Poet Zeb Ghauri. Naqsh-e-taswir Na Wo Sang Ka Paikar Koi is written by Zeb Ghauri. Read famous Poem Naqsh-e-taswir Na Wo Sang Ka Paikar Koi for youth and Student by Zeb Ghauri. Free Download Naqsh-e-taswir Na Wo Sang Ka Paikar Koi in PDF.