Gul-chandni

kal sham yaad aaya mujhe!

aise ki jaise KHwab tha

kone mein aangan ke mere

gul-chandni ka piDa tha

main sari sari dopahar

sae mein us ke khelti

phulon ko chhu kar bhagti

shaKHon se mil kar jhulti

is ke tane mein bisiyon!

lohe ki kilen thin jaDi

kilon ko mat chhuna kabhi

takid thi mujh ko yahi!

ye raaz mujh pe fash tha

is peD par aaseb tha!

ek mard-e-kaamil ne magar

aisa amal us par kiya

bahar wo aa sakta nahin!!

kilon mein us ko jaD diya

han koi kilon ko agar

khinga upar ki taraf!

aaseb bhi chhuT jaega

phulon ko bhi kha jaega

patton pe bhi manDlayega

phir dekhte hi dekhte

ye ghar ka ghar jal jaega

is sahn-e-jism-o-jaan mein bhi

gul chandni ka peD hai!

sab phul mere sath hain

patte mere hamraaz hain

is peD ka saya mujhe!

ab bhi bahut mahbub hai

is ke tane mein aaj tak

aaseb wo mahsur hai

ye sochti hun aaj bhi!

kilon ko gar chheDa kabhi

aaseb bhi chhuT jaega

patton se kiya lena use

phulon se kiya matlab use

bas ghar mera jal jaega

kya ghar mera jal jaega?

(791) Peoples Rate This

Your Thoughts and Comments

Gul-chandni In English By Famous Poet Zehra Nigaah. Gul-chandni is written by Zehra Nigaah. Read famous Poem Gul-chandni for youth and Student by Zehra Nigaah. Free Download Gul-chandni in PDF.