Shahr-e-ashob

wahi sada jo mere KHun mein sarsaraati thi

wo saya saya hai ab har kisi ki aankhon mein

ye sarsarahaTen sanpon ki siTiyon ki tarah

siyahiyon ke samundar ki tah se mauj-ba-mauj

hamari bikhri safon ki taraf lapakti hain

badan hain barf, ragen rahguzar-e-reg-e-rawan

kai to sahm ke chup ho gae hain surat-e-sang

jo bach gae hain wo ek dusre ki gardan par

jhapaT paDe hain misal-e-sagan-e-awara

hawa guzarti hai sunsan siskiyon ki tarah

sada-e-dard jo mere lahu mein larzan thi

jhalak rahi hai wo ab be-shumar aankhon mein

labon pe sukh gai harf-e-shauq ki shabnam

kisi mein taqat-e-guftar agar kahin hai bhi

to lafz aate hain honTon pe hichkiyon ki tarah

tarashiye to kai pattharon ke sinon mein

shajar ki shaKHon ke manind naqsh phaile hain

par un ke reshon mein zauq-e-numu nahin malta

koi nafeer ki jis ki nawa-e-hosh-nawaz

dilon se dur kare sarsarahaTon ka tilism

koi umid ka paigham koi pyar ka ism

wo KHwab-e-parwarish-e-jaan ki jis pe sadqe hon jism

(1150) Peoples Rate This

Your Thoughts and Comments

Shahr-e-ashob In English By Famous Poet Zia Jalandhari. Shahr-e-ashob is written by Zia Jalandhari. Read famous Poem Shahr-e-ashob for youth and Student by Zia Jalandhari. Free Download Shahr-e-ashob in PDF.