Tu Payambar Sahi Ye Moajiza Kafi To Nahin

tu payambar sahi ye moajiza kafi to nahin

shairi zist ke zaKHmon ki talafi to nahin

saya-e-gul mein zara der jo sustae hain

saya-e-dar se ye wada-KHilafi to nahin

apni duniya se mili fursat-e-yak-jast hamein

aasman ke liye ek jast hi kafi to nahin

kisi chaDhte hue suraj ki parastish na karo

dekh lo is mein koi shoabada-bafi to nahin

tishnagi hum ko mili tum hue sairab to kya

in muqaddar ki sazaon se muafi to nahin

dew-mala ka dhundlaka ho ki KHwabon ki kiran

aaj ki aaina-sazi ki munafi to nahin

KHwab Takrao haqiqat se ki shoale niklen

is andhere mein diya ek hi kafi to nahin