KHafa Mat Ho Mujhko Thikane Bahut Hain

KHafa mat ho mujh ko Thikane bahut hain

mera sar rahe aastane bahut hain

bahut dur hai apne nazdik tu bhi

tujhe yaad kafir bahane bahut hain

bahane na kar mujh se ai chashm-e-giryan

abhi ashk mujh ko bahane bahut hain

mere chashm-o-dil aur jigar sab hain hazir

tu KHatir-nishan rakh nishane bahut hain

kashish dil ki hi kaam karti hai warna

fusun sainkaDon hain fasane bahut hain

junun naqd-e-dagh-e-jigar mangta hai

ye kah do ki ab to KHazane bahut hain

bahut kam hai sach is zamane mein 'ehsan'

yahan jhuT ke kar-KHane bahut hain