Ye Rah-e-ishq Hai Is Rah Pe Gar Jaega Tu

ye rah-e-ishq hai is rah pe gar jaega tu

ek diwar khaDi hogi jidhar jaega tu

shor-e-duniya ko to sun rang-e-rah-e-yar to dekh

hum jahan KHak uDate hain udhar jaega tu

dar-ba-dar hai to kahin ji nahin lagta hoga

wo bhi din aaega thak-haar ke ghar jaega tu

aazim-e-hijr-e-musalsal hua is miTTi se

lauT aaega yahin aur kidhar jaega tu

jaan jaega ki manzil nahin maujud kahin

KHush-guman hai abhi sargarm-e-safar jaega tu

aarzu rakh use pane ki koi roz abhi

phir yahin baam-e-tamanna se utar jaega tu

ye jo tufan tere gird hai diwangi ka

ek zara tez hua aur bikhar jaega tu

karwan rad hua aur chup hui aawaz-e-jaras

kya ab us samt ko ta-hadd-e-nazar jaega tu

ab kahan KHwab-e-mohabbat ki wo shab dur nahin

jab kahin KHak-bhari nind se bhar jaega tu