Ek Fana Ke GhaT Utra Ek Pagal Ho Gaya

ek fana ke ghaT utra ek pagal ho gaya

yani mansuba zamane ka mukammal ho gaya

jism ke barfab mein aankhen chamakti hain abhi

kaun kahta hai ki us ka hausla shal ho gaya

zehn par be-samtiyon ki barishen itni huin

ye ilaqa to ghane raston ka jangal ho gaya

is kalid-e-ism-e-na-malum se kaise khule

dil ka darwaza ki andar se muqaffal ho gaya

shoala-zar-e-gul se guzre to sar-e-aghaz hi

ek sharar aankhon se utra KHun mein hal ho gaya

shahr-e-ainda ka dariya hai giraft-e-reg mein

bas ki jo hona hai us ka faisla kal ho gaya

mausam-e-taKHir-e-gul aata hai kis ke nam par

kaun hai jis ka lahu is KHak mein hal ho gaya

is qadar KHwabon ko masla pa-e-ahan-posh ne

shauq ka aain bil-aKHir moattal ho gaya