Wo Para Hun Main Jo Aag Mein Hun Wo Barq Hun Jo Sahab Mein Hun

wo para hun main jo aag mein hun wo barq hun jo sahab mein hun

zamin pe bhi iztirab mein hun falak pe bhi iztirab mein hun

na main hawa mein na KHak mein hun na aag mein hun na aab mein hun

shumar mera nahin kisi mein agarche main bhi hisab mein hun

agarche pani ki mauj ban kar hamesha main pech-o-tab mein hun

wahi hun qatra wahi hun dariya jo ain chashm-e-habab mein hun

sulaya kis ne gale laga kar ki sur bhi thak gaya jaga kar

bapa hai aalam mein shor-e-mahshar mujhe jo dekho to KHwab mein hun

maza hai saqi tere karam se zuhur mera hai tere dam se

wo baada hun jo hun mai-kade mein wo nashsha hun jo sharab mein hun

ilahi wo gore gore talwe kahin na ho jaen mujh se maile

ki KHak ban kar ba-rang-e-surma hamesha chashm-e-rikab mein hun

jo bhes apna badal ke aaya to rang-e-itlaq munh se dhoya

kiya hai pani mein qaid mujh ko hawa ki surat habab mein hun

ghazab hai josh-e-zuhur tera pukarta hai ye nur tera

KHuda ne andha kiya hai jis ko usi ke aage hijab mein hun

hui hai donon ki ek haalat na chain us ko na chain mujh ko

udhar wo hai mahw shoKHiyon mein idhar jo main iztirab mein hun

ilahi mujh par karam ho tera na khol aamal-nama mera

pukarta hai ye KHatt-e-qismat ki main bhi fard-e-hisab mein hun

dimagh mein hun qadah-kashon ke dahan mein aaya hun mah-washon ke

nasha wo hun jo sharab mein hun maza wo hun jo kabab mein hun

wo apna chehra agar dikhae yaqin andhon ko KHak aae

pukarti hai ye be-hijabi ki main azal se hijab mein hun

alahada kar ke KHud se mujh ko jo tu ne baKHsha to KHak baKHsha

agarche jannat mujhe mili hai ilahi phir bhi azab mein hun

hujum nazron ka hai wo munh par diya hai dono ko jis ne dhoka

yaqin ye mujh ko paDa hai parda guman ye un ko naqab mein hun

jo mujh ko us se juda karoge to mera nuqsan kya karoge

nahin hun manind-e-sifr kuchh bhi agarche main bhi hisab mein hun

na aaya mar kar bhi chain mujh ko uTha meri KHak se bagula

buton ka gesu to main nahin hun ilahi kyun pech-o-tab mein hun

jo haal puchho to ek kahani nishan puchho to be-nishani

wo zarra hun jo miTa hua hun agarche main aaftab mein hun

miTa agarche mazar mera chhuTa na wo shahsawar mera

pukarta hai ghubar mera ki main bhi hazir rikab mein hun

karam ki 'mail' pe bhi nazar ho nazar mein phir chulbula asar ho

azal se ummid-war main bhi ilahi teri janab mein hun

(854) Peoples Rate This

Your Thoughts and Comments

Wo Para Hun Main Jo Aag Mein Hun Wo Barq Hun Jo Sahab Mein Hun In English By Famous Poet Ahmad Husain Mail. Wo Para Hun Main Jo Aag Mein Hun Wo Barq Hun Jo Sahab Mein Hun is written by Ahmad Husain Mail. Read famous Poem Wo Para Hun Main Jo Aag Mein Hun Wo Barq Hun Jo Sahab Mein Hun for youth and Student by Ahmad Husain Mail. Free Download Wo Para Hun Main Jo Aag Mein Hun Wo Barq Hun Jo Sahab Mein Hun in PDF.