Ejaz Hai Ye Teri Pareshan-nazari Ka

ejaz hai ye teri pareshan-nazari ka

ilzam na dhar ishq pe shorida-sari ka

is waqt mere kalba-e-gham mein tera aana

bhaTka hua jhonka hai nasim-e-sahari ka

tujh se tere kuche ka pata puchh raha hun

is waqt ye aalam hai meri be-KHabari ka

ye farsh tere raqs se jo gunj raha hai

hai arsh-e-moalla meri aali-nazari ka

kohre mein taDapte hue ai subh ke tare

ehsan hai shair pe teri chaaragari ka