Subh-e-wajud Hun Ki Shab-e-intizar Hun

subh-e-wajud hun ki shab-e-intizar hun

main aashkar hun ki pas-e-ashkar hun

har rang-e-be-qarar hun har naqsh-e-na-tamam

miTTi ka dard hun ki sitaron ka pyar hun

kuchh to mere wajud ka hissa hai tere pas

warna main apne aap mein kyun intizar hun

ek aur aasman chamakta hai KHwab mein

ek aur kaenat ka aaina-dar hun

tu ne mujhe KHayal kiya tha isi tarah

gard-o-ghubar mein bhi sitara-shiar hun

jari ho be-mahaar talluq ki salsabil

ek aisi barshgal ka ummid-war hun

kaise khaDa hun kis ke sahaare khaDa hun main

apna yaqin hun ki tera e'tibar hun

ek bar apne ghar se nikala gaya tha main

phir is ke baad gardish-e-lail-o-nahaar hun

bas kuchh dinon ki aur saubat hai dhup ki

sahra-e-jism par koi barg-zar hun

tere jamal se meri aaankhon mein nur hai

tera KHayal hai to main bagh-o-bahaar hun

sanson ke darmiyan sulagte hain baal-o-par

phir bhi kisi uDan ka ummid-war hun

'ahmad' kisi zaman-o-makan ka nahin hun main

lamhon ki der hai jo sar-e-abshaar hun