Dahakte Kuchh KHayal Hain Ajib Ajib Se

dahakte kuchh KHayal hain ajib ajib se

ki zehn mein sawal hain ajib ajib se

tha aaftab subh kuchh to sham ko kuchh aur

uruj aur zawal hain ajib ajib se

har ek shahrah par dukanon mein saje

tarah tarah ke mal hain ajib ajib se

wo pas ho ke dur hai to dur ho ke pas

firaq aur visal hain ajib ajib se

nikalna in se bach ke sahal is qadar nahin

qadam qadam pe jal hain ajib ajib se

adab faqat adab hai? ya hai tarjuman-e-zist?

mere yahi sawal hain adib adib se