Kabhi Jo Aankhon Mein Pal-bhar Ko KHwab Jagte Hain

kabhi jo aankhon mein pal-bhar ko KHwab jagte hain

to phir mahinon musalsal azab jagte hain

kisi ke lams ki tasir hai ki barson baad

meri kitabon mein ab bhi gulab jagte hain

burai kuchh to yaqinan hai be-hijabi mein

magar wo fitne jo zer-e-naqab jagte hain

sitam-shiaron hamara tum imtihan na lo

hamare sabr se sad inqalab jagte hain

hamein KHud apni samaat pe sharam aati hai

ki mimbaron se ab aise KHitab jagte hain

ye nind leti hai 'aKHlaq' wo KHiraj ki bas

jo KHub sote hain ho kar KHarab jagte hain