Un Ras Bhari Aankhon Mein Haya Khel Rahi Hai

un ras bhari aankhon mein haya khel rahi hai

do zahr ke pyalon pe qaza khel rahi hai

hain nargis-o-gul kis liye mashur-e-tamasha

gulshan mein koi shoKH ada khel rahi hai

us bazm mein jaen to ye kahti hain adaen

kyun aae ho, kya sar pe qaza khel rahi hai

us chashm-e-siyah mast pe gesu hain pareshan

maiKHane pe ghanghor ghaTa khel rahi hai

bad-masti mein tum ne unhen kya kah diya 'aKHtar'

kyun shoKH-nigahon mein haya khel rahi hai