عرفان و آگہی کے سزا وار ہم ہوئے

عرفان و آگہی کے سزا وار ہم ہوئے

سویا پڑا تھا شہر کہ بیدار ہم ہوئے

تا عمر انتظار سہی پر بروز حشر

اچھا ہوا کہ تیرے طلب گار ہم ہوئے

ہم پر وفائے عہد انا الحق بھی فرض تھا

اس واسطے کہ محرم اسرار ہم ہوئے

ٹھہرے گی ایک دن وہی معراج بندگی

جو بات کہہ کے آج گنہ گار ہم ہوئے

ہوتے گئے وہ خلق فریبی میں ہوشیار

جتنا کہ تجربے سے سمجھ دار ہم ہوئے

نادان تھے کہ مسند ارشاد چھوڑ کر

حلقہ بگوش سیرت و کردار ہم ہوئے

اس دور خود فروش میں اخترؔ بصد خلوص

خمیازہ سنج جرأت اظہار ہم ہوئے