Kis Kis Se Dosti Hui Ye Dhyan Mein Nahin

kis kis se dosti hui ye dhyan mein nahin

un mein se ek bhi mere saman mein nahin

rasm-e-wafa ka us se nibhana bhi hai muhaal

tark-e-talluqat bhi imkan mein nahin

bandhen kisi se ahd-e-wafa hum to kis tarah

ek tar bhi to apne gareban mein nahin

kyun hum ne haar man li kyun Dal di sipar

ye saneha shikast ke elan mein nahin

ye jaan supurdagi hai usi ek baat par

jo baat mere ishq ke paiman mein nahin

shoridgi ko hain sabhi aasudgi nasib

wo shahr mein hai kya jo bayaban mein nahin

'tishna' wo shab likhi hai hamare nasib mein

jis ki sahar ka zikr bhi imkan mein nahin