Kahin Salib Kahin Karbala Nazar Aae

kahin salib kahin karbala nazar aae

jidhar nigah uThe zaKHm sa nazar aae

bujhi hai pyas zamin ki to ye tapish kyun hai

wo abr hai to barasta hua nazar aae

baja hai apni aqidat magar sawal ye hai

wo aadmi ho to kyunkar KHuda nazar aae

chalo ki gher len us ko lahu lahu chehre

har ek samt use aaina nazar aae

hamin ne tan se juda kar liya hai sar apna

bas ek hum the jo sab se juda nazar aae

kahan kahan abhi imkan-e-zindagi hai 'amir'

dhuan chhaTe to koi rasta nazar aae