KHema-e-jaan Ko Jo Dekhun To Sharar-bar Lage
KHema-e-jaan ko jo dekhun to sharar-bar lage
tar-e-shabnam bhi yahan shoalon ka bazar lage
ek hasrat pas-e-dahliz-e-ana baiThi rahi
koi to aa ke ruka ho dar-o-diwar lage
chashm-e-pur-ab mein bahti thi siyahi shab ki
dhup ka raqs mujhe aur giran-bar lage
kya hua manzar-e-maujud ki peshani ko
zard patton ki tarah saya-e-ashjar lage
meri wahshat ka lahu chaT chuki hai duniya
ab tamasha-e-KHirad surat-e-azar lage
mera chehra hai kisi qabr ka katba 'amir'
dil ki aawaz bhi ab shor-e-azadar lage
Amir Nazar 
(845) Peoples Rate This