Ehsas Ki Ragon Mein Utarne Laga Hai Wo

ehsas ki ragon mein utarne laga hai wo

ab bund bund mujh mein bikharne laga hai wo

gumnamiyon ki andhi guphaen hon nauha-KHwan

manind-e-aftab ubharne laga hai wo

kaise kahun ki gham hua KHwabon ki bhiD mein

zaKHmon ka indimal to karne laga hai wo

ek harf-e-atishin bhi nahin us ke honT par

lagta hai lahza lahza ThiThurne laga hai wo

imkan ki hadon se guzarne ke baad kyun

ab reza reza ho ke bikharne laga hai wo

utra tha meri ruh ke rauzan se jo kabhi

ghuT ghuT ke mere jism mein marne laga hai wo