Jab Zamin Ke Muqaddar Sanwar Jaenge

jab zamin ke muqaddar sanwar jaenge

aasman se farishte utar aaenge

kaise phailenge wo log ufuq-ta-ufuq

apne andar simaT kar jo rah jaenge

chandni mauj-dar-mauj lahraegi

aks taron ke pani se tharraenge

barish-e-sang karte chale jaen wo

hum lahu ro ke bhi phul barsaenge

kanch ka jism le kar kisi shahr mein

wo agar jaenge bikhar jaenge

jin mein tanwir-e-ehsas jagi na ho

zehn aise khanDar hi to kahlaenge

ret uDegi jo sahra-e-iKHlas mein

aur kya apni muTThi mein hum laenge