Qurbat BaDha BaDha Kar Be-KHud Bana Rahe Hain

qurbat baDha baDha kar be-KHud bana rahe hain

main dur haT raha hun wo pas aa rahe hain

eajaz-e-pak-bazi hairat mein la rahe hain

dil mil gaya hai dil se pahlu juda rahe hain

wo dil se gham bhula kar dil ko lubha rahe hain

guzre hue zamane phir phir ke aa rahe hain

sine mein zabt-e-gham se chhaala ubhar raha hai

shoale ko band kar ke pani bana rahe hain

mani na puchh zalim is uzr-e-be-gunah ke

apne ko awwal de kar tujh ko bacha rahe hain

ai be-KHudi kahan hai jaldi meri KHabar le

bhule the jo ba-mushkil phir yaad aa rahe hain

len kaam zabt se kya ulTa hai dil ka phoDa

utna ubhar raha hai jitna daba rahe hain

furqat mein saz-e-rahat saman azab ka hai

ThanDi hawa ke jhonke kya ji jala rahe hain

hain husn ke karishme kya inqalab-agin

gham-KHwar jo the kal tak ab KHar kha rahe hain

KHud in ki justuju mein hum dur bhage warna

wo kab alag rahe hain wo kab juda rahe hain

le le ke ThanDi sansen puchho na haal dekho

tum bhed kholte ho aur hum chhupa rahe hain

dekh 'arzu' ye rona shana hila hila kar

tu aaj KHwab mein hai aur wo jaga rahe hain

(711) Peoples Rate This

Your Thoughts and Comments

Qurbat BaDha BaDha Kar Be-KHud Bana Rahe Hain In English By Famous Poet Arzoo Lakhnavi. Qurbat BaDha BaDha Kar Be-KHud Bana Rahe Hain is written by Arzoo Lakhnavi. Read famous Poem Qurbat BaDha BaDha Kar Be-KHud Bana Rahe Hain for youth and Student by Arzoo Lakhnavi. Free Download Qurbat BaDha BaDha Kar Be-KHud Bana Rahe Hain in PDF.