SuKHan-wari Ka Bahana Banata Rahta Hun
suKHan-wari ka bahana banata rahta hun
tera fasana tujhi ko sunata rahta hun
main apne aap se sharminda hun na duniya se
jo dil mein aata hai honTon pe lata rahta hun
purane ghar ki shikasta chhaton se ukta kar
nae makan ka naqsha banata rahta hun
mere wajud mein aabaad hain kai jangal
jahan main hu ki sadaen lagata rahta hun
mere KHuda yahi masrufiyat bahut hai mujhe
tere charagh jalata bujhata rahta hun
Asad Badayuni 
(891) Peoples Rate This