Adawaton Ka Ye Usko Sila Diya Humne

adawaton ka ye us ko sila diya hum ne

ana ko us ki hamin mein Duba diya hum ne

malal-o-huzn se ho kar guzarti rahon ko

yaqin-o-shauq se paiham mila diya hum ne

misal ban gai mahbub aur habib ki zat

ye aaina sar-e-alam dikha diya hum ne

tamam jabr-o-tashaddud ki had bhi KHatm hui

ki jab se sabr ko mehwar bana diya hum ne

kisi KHayal ka aana muhaal hai ab to

tasawwuraat ka KHema jala diya hum ne

abhi bhi ungli uThane ki rasm baqi hai

har ek sabab ko agarche miTa diya hum ne

ab aur gharq-e-tajassus na ho meri KHatir

tumhein to faisla apna suna diya hum ne

ye lazmi hai ki 'asra' bhula diya jae

jo raaz dil ki zamin mein daba diya hum ne