Kya Waqt PaDa Hai Tere Aashufta-saron Par

kya waqt paDa hai tere aashufta-saron par

ab dasht mein milte nahin milte hain gharon par

pahchan lo is KHak-e-rah-e-hirs-o-hawas ko

qadmon se ye uThti hai to girti hai saron par

KHud apne hi andar se ubharta hai wo mausam

jo rang bichha deta hai titli ke paron par

saughat samajhte the jise dasht-e-wafa ki

wo KHak bhi sajti nahin ab apne saron par

ubhra na tera husn-e-KHad-o-KHal abhi tak

taswir teri qarz hai taswir-garon par

kanTe bhi chune rah ke patthar bhi haTae

manzil na hui sahl magar ham-safaron par

phir pakke makanon ke makin KHanda-ba-lab hain

yalghaar hai dariyaon ki phir kachche gharon par